សម្ដេចសខេងស្នើអង្គភាពថ្នាក់ក្រោមបញ្ឈប់ការតែងតាំងមន្ត្រីបក្សពួកខ្លួនចូលកាន់ដំណែងសំខាន់
08-July-2016 | ដោយ មែន កំសត់
ភ្នំពេញ ៖ ខណៈក្រសួងមហាផ្ទៃ កំពុងបានប្រគល់ផ្ទេរមុខដំណែងការងារឲ្យថ្នាក់ក្រោមទទួលខុសត្រូវរដ្ឋមន្ត្រីក្រសួងមហាផ្ទៃ ស្នើឲ្យបណ្ដាថ្នាក់ដឹកនាំអង្គភាពថ្នាក់ក្រោមគ្រប់លំដាប់ថ្នាក់ ត្រូវបញ្ឈប់ការគិតគូរលើមនោសញ្ចេតនាប្រកាន់បក្ស ឬតែងតាំងសាច់ញាតិខ្លួនដែលអសមត្ថភាព ឡើងកាន់ដំណែងនានាពិសេសការតែងតាំងចូលកាន់ដំណែងសំខាន់ដែលធ្វើឲ្យមានការរាំងស្ទះទៅដល់ដំណើរការវិវត្តន៍ទៅមុខរបស់អង្គភាព។
ក្នុងពិធីតែងតាំងអនុរដ្ឋលេខាធិការ១រូបអគ្គលេខាធិការអគ្គនាយករងនិងដំឡើងឋានន្តរសក្ដិជូននាយនគរបាលជាន់ខ្ពស់ក្រសួងមហាផ្ទៃថ្ងៃទី៧ខែកក្កដានៅទីស្ដីការក្រសួងសម្ដេចក្រឡាហោមស ខេងឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មានប្រសាសន៍ថាការតែងតាំងមន្ត្រីថ្នាក់ក្រោមគឺគ្រប់បណ្ដាអង្គភាពនៅថ្នាក់ក្រោមត្រូវពិនិត្យពិចារណាលើកទឹកចិត្តអ្នកមានសមត្ថភាពជំនាញមានការទទួលខុសត្រូវការងារខ្ពស់ខិតខំធ្វើការពិតប្រាកដជារួមការតែងតាំងដំឡើងមុខងារគឺត្រូវគោលលើគោលការណ៍យុត្តិធម៌។
ប្រសាសន៍របស់សម្ដេចក្រឡាហោមស ខេងបានធ្វើឡើងបន្ទាប់ពីក្រសួងបានចេញសេចក្ដីប្រកាសឲ្យសាលាបណ្ឌិតសភានគរបាលកម្ពុជាបើកវគ្គបណ្ដុះបណ្ដាលតាមឋានានុក្រមទាំងបីកម្រិតជូនមន្ត្រីថ្នាក់ក្រោមឲ្យចេះពីរបៀបធ្វើការងារមុននឹងតែងតាំងឡើងកាន់ដំណែងថ្មី។
កន្លងទៅតាមអង្គភាពថ្នាក់ក្រោមមានដូចជានគរបាលប៉ុស្តិ៍រដ្ឋបាលអធិការនិងនគរបាលនៅស្នងការដ្ឋានជាដើមនោះមានចំនួនមនុស្សចូលធ្វើការច្រើនប៉ុន្តែលទ្ធផលការងារគឺមិនទាន់លក្ខណៈល្អប្រសើរនោះទេដែលបញ្ហនេះសម្ដេចក្រឡាហោមបានស្នើឲ្យអង្គភាពថ្នាក់ក្រោមត្រូវពិនិត្យលើការងាររបស់ខ្លួនឡើងវិញនិងត្រូវម្ចាស់ការការងារដោយខ្លួនឯងឲ្យល្អដើម្បីធានាប្រសិទ្ធភាពការងារការពារសន្តិសុខសណ្ដាប់ធ្នាប់និងការបម្រើសេវានានាជូនប្រជាពលរដ្ឋឲ្យបានល្អប្រសើរ។
សម្ដេចក្រឡាហោមបន្តថាក្រសួងមហាផ្ទៃកំពុងត្រូវការមន្ត្រីដែលមានសមត្ថភាពចូលបំពេញការងារដែលក្រសួងបាន និងកំពុងធ្វើប្រតិភូកម្មផ្ទេរមុខងារប្រគល់មុខដំណែងការងារនានាបង្កលក្ខណៈឲ្យអង្គភាពគ្រប់ផ្នែកនៅថ្នាក់ក្រោមចេះធ្វើការប្រកបដោយការទទួលខុសត្រូវ៕
ចំនួនអ្នកទស្សនា
- ថ្ងៃនេះ1121
- ម្សិលមិញ4501
- សប្តាហ៍នេះ1121
- ខែនេះ10821
- ឆ្នាំនេះ254061
- សរុប20696517